Luke 4

A Valamaan Na Yesus

Mt 4:1-11; Mk 1:12-13

1Na Yesus xo aava bas xapiak pana Vovau Xaradak, a ta'ulan a Raarum Jordan e lapaana paamuian sina Vovau Xaradak nane sangas xolai la bina vingil. Nane waan pave a yaan sangafilu talafaat e lana mu yaan aanabe' ve na Setan a valame. Nane pi fafangan la maana yaan aave e lamina nane lagai.

3Na Setan a ferawai xe si Yesus e a kuus, “Tamo no lamon o nano, no Lak sina Piran lavaxa, fasavat a bret pana faat aanabe'.”

4Na Yesus a suie, “Lana Ferawaian sina Piran a kuus ‘A mataa i taa pife siak a gutan sena bret sang mon.” ^a

5Na Setan a lisan falaxe xe la nobina laa'ui e lana yaan aava malaan sena yaamit, a faxalite pana maana mu bina xapiak. 6E nane xuus na Yesus, “A maana mu bina aave ri siak e ne paamuiane. Ne fexaxaas sena tavai nase' ta mataa ne vubuxane, pana maana mu bina aave. 7Tamo no taa fa'isinau pana Piran siim ne taa pisingan nano pana.”

8Na Yesus a suie, “Lana Ferawaian sina Piran a kuus, ‘Nangus a Memai, a Piran siim, e no taa sisiak sina mon.” ^b

9Na Setan a lisane xe Jerusalem e fatigineie laa'ui paaliu xuluna tang lifu lotu e a kuus, “Tamo nano, no Natuna Piran, no taa tapin fasivi nano xa. 10Senaso lana Ferawaian sina Piran a kuus, ‘Nane taa feng a mu angelo sina xena faxatang faroxoi nano. 11Ri taa yaas nano xe laa'ui pana mari talo a kaam i taa pife du sui a faat.” ^c

12Na Yesus a suie, “A Ferawaian sina Piran a kuus, ‘Muta valam a Memai aava Piran siim.” ^d

13Layaan na Setan fo fataxapin a mu valaman aanabe' nane ta'ulane fefexaxaas a yaan fa'ui ina valaman i taa savat.

A Rabuna Pe Nasaret Ri Tisui Na Yesus

14E voxo, na Yesus a ta'ulan a bina vingil e ulaa xe pe Galili lapaana gutan sina Vovau Xaradak e maana rabuna lana mu bina pave ri ferawai sena. 15Nane fepitaa lana lifu ina faxuvulan sina mu Juda e a mu rabuna xapiak ri faatulane.

16Nane falet xe puaa Nasaret, a bina aava nane a lak dak lana, e malaan sena vilaana sina, lana Yaan ina Fangaafusan a laak lana lifu ina faxuvulan e nane tigina xena kat. 17Ri tavaie pana xakalayan si Aisaia. Nane siaxe e a muluse e layaan a tingin a xakalayan aava kuus malaan a kate:

18“A vovau sina Piran a xafutau senaso nane fo noxolau
xena kuusan fasavat a Lagasai Roxo xe sina mu valagof.
Nane fengau xena kuus fatexaas o nari aava ri vipis ri taa mulus tapinan;
a mu mata piif ri taa kaalum fulaa
e a mu rabuna aava ri waan lapaana gutan sina xaiyaas siri ri taa ta'ulai xaseri
19e xena kuus o lana mu yaan aanabe'
a Piran i taa faxalit netaara pana roxoyan sina.” ^e
20Lamina kataana, nane fulus a Lagasai aave e a tavai a saxa fefeng la lifu ina faxuvulan pana. E bak a nai xena fepitaa. A mu rabuna xapiak lana lifu ina faxuvulan ri kaalum fatateak xe sina. 21Nane tangpat pana fepitaian sina malaan, “Tanin xo, a Ferawaian sina Piran aanabe' aava mi fo langaie, fo savat la matavas.”

22A mu rabuna ri ferawai faroxo sena fepitaian sina e ri ipul pana ferawaian marafut aava savat la valana. E ri fiai, “Nane a lak si Yosep, bo?”

23Na Yesus a kuus xe siri, “Tuuna paaliu, mi taa xuusau pana ferawaian paap aanabe', ‘Mataa ina i'irin, vil faroxoi nano xa’ e mi taa kuus fulaa, ‘Maam fo langai o no fo vil a maana mo fa'ipul pe Kapanam lavaxa, fasavat a mo malaan, nabe' la fufubina siim.”

24Nane ferawai fulaa e a kuus, “Ne kuus tuuna, a mataa ina kuus fatuxai xo, a mu rabuna ti la fufubina sina, ri taa tisuie. 25Ne xuus tuunei nami, lana yaan si Ilaija, layaan piau ta raafui pana mariaas talatul e xavil e a song molava a savat pe Israel, a toxan a maana lutefin nakmaal xaves. 26Taasaxa Piran pife feng na Ilaija xe siri, piau, nane fenge xe sina saxa tefin pe Serafet la bina Saidan. 27E vaxa, a rabuna xaves pe Israel a tari tapak lana yaan si Ilaisa, a xasa mataa ina kuus fatuxai, taasaxa pi ta mataa tapak ti Israel a savat roxo fa'ulaa, piau, na Neman ti Siria mon.”

28Layaan a rabuna lana lifu ina faxuvulan ri langaie ri marala faagut. 29Ri fasangas na Yesus xe laa'ui xuluna put la nobina aava masasaaf xena tapin faduie lapi la matana mui. 30Taasaxa nane sangas fatak la palou iri e ta'ulan nari.

Na Yesus A Gei Tapin A Vovau Saat

Mk 1:21-28

31E bak nane sivi xe kol Kapanam, saxa bina pe Galili e la Yaan ina Fangaafusan a tangpat pana fapitiaana mu rabuna pave. 32Nari, ri ipul pana fepitaian sina senaso a toxan a gutan.

33Pave lana lifu ina faxuvulan, a toxan a saxa mataa aava vovau saat a vawe. Nane xukulai faagut pana matautan malaan, 34“Yesus ti Nasaret, no taa vil a so xe simaam? No savat xena kawaasan xapin nemaam, bo? Ne texaas sema, nano, no Mataa Failai sina Piran.”

35Na Yesus a sui faagutane, “Kasam! Ta'ulane!” E a vovau saat moxo a tapin fasivi a mataa aave la matari e a ta'ulane taasaxa pife fasope.

36A mu rabuna xapiak ri ipul faagut e ri fiai, “A so ta buk ferawaian va nabe'? Pana gutan e texaasan nane fuuna fasei faagutan a mu vovau saat e ri savat ta'ulan a mataa.” 37E lana maana nu bina aava faasilak se Kapanam a rabuna ri langai pana mu faisok si Yesus.

Na Yesus A Vil Faroxoi A Maana Rabuna Xaves

Mt 8:14-17; Mk 1:29-38

38Na Yesus a ta'ulan a lifu ina faxuvulan aave e a falet xe la lifu si Saimon. Na imu Saimon a giis pana tana lalagaf e ri fin na Yesus rao i taa xavange. 39Nane tigina la tana e a baras a giisan e a giisan a ta'ulane. A tefin aave a tamasiak fataapus e a faigotan a kas xari.

40Layaan a ngaas i taxa rul e a Yaan ina Fangaafusan a taxapus, a rabuna ri lisan a mu rabuna aava ri giis xe si Yesus. Nane tao nari saxa saxa pana mana e ri feroxo fa'ulaa. 41E vaxa, a mu vovau saat ri ta'ulan a maana rabuna xaves. Ri ta'ulan nari e ri xukulai faagut malaan, “Nano, no Lak sina Piran.” Taasaxa nane baras nari talo ri taa pife ferawai senaso ri texaas o nane ve a Mataa Failai sina Piran.

Na Yesus A Kuus Fasavat Lana Mu Lifu Ina Faxuvulan

42La paanen lolof na Yesus a falet xe la bina gof talo i taa waan nane sang. A rabuna ri senge e layaan ri tingine ri rao ri tivotane o i muta ta'ulan nari. 43Taasaxa nane kuus, “Ne taa kuusan fasavat a Lagasai Roxo sena fatataganan sina Piran la xasano bina sait. Nabe' ve a faisok aava Piran a fengau xena vile.” 44E nane sangas xolai e a ferawai lana maana lifu ina faxuvulan xaves pe Judia.